هەداركێشان د گەل كەسانێ ئاست نزم دا
(كۆمەكا سەربازان دڤيا ل دەڤەرەكێ بۆ
دەڤەرەكا دى بچن. پشتى بۆ ماوەيەكى ئەو چووين گەهشتنە دەڤەرەكا مين ڕێژكرى. ئێك ژ
سەربازان ئەو كەرێ د گەل وان دا ل سەر پشتا خۆ هەلگرت و بەردەوامى دا ڕێكا خۆ ئەوا
تژى مين. گەلەك سەربازان ترانە پێكرن و پێ كرە كەنى. لێ وى پويتە ب وان نەدا و
گوهێ خۆ نەدا وان و هەدار ل سەر ئەڤێ چەندێ كێشا هەتا ل ئەوێ دەڤەرا مەترسيدار ب
سەلامەتى دەرباز بووين.)
د ڕاستى دا سەربازى ئەڤ
چەندە ئەنجام دا نە ژ بەر كو وى گەلەك حەز ژ كەرى دكر لێ ئەو ئەرد يێ تژى بوو ژ
مينان و كەر د ڕەفتار و كريارێن خۆ دا يێ تەمام نينە (يێ ساويلكەيە) ئەگەر پێيێ وى
كەفتە ل سەر مينەكێ دێ خۆ و هەمى ئەو كەسێن ل دۆر خۆ كۆژيت.
ئەم ژى د ژيانا خۆ يا
ئاسايى دا گەلەك جاران تويشى ئەڤى هەلويستى دبين و نەچار دبين ژيانا خۆ د گەل
ئەڤان جۆرە كەران (ببورن: مەرەما من: "ئەڤان جۆرە كەسان") دەرباز بكەين
و هەدارێ د گەل بكێشين ژ بەر بەرژەوەندييەكا دى چ يا تايبەت بيت يان يا گشتى.
مرۆڤ يێ هاتييە ئافراندن
دا ب كۆم بژيت، ڤەدەرى و خۆ دويركرن ژ كۆمێ نە ژ سروشت و نەريتێ مرۆڤێ ئاساييە.
ڕاستە مرۆڤ هەتا ڕادەيەكێ ئازادييا خۆ يا تاكە كەسى و هندەك جاران مافێن خۆ ژى يێن
تايبەت ژدەست ددەت يان سنوردار دكەت لێ ئەڤ چەندە پێخەمەت مژارەكا پيرۆز و پايە
بلندە و خۆدان ڕەهەندێن هەژى و پڕ بهايە. ئەو كەسێ دكاريت ئەڤێ چەندێ ئەنجام بدەت
و ملێ خۆ دابنێتە بەر ئەڤى بارى ب ڕاستى كەسەكێ خەمخۆر و ئەمەكدارە بۆ ئەندامێن
مالباتا خۆ و هەڤالێن خۆ و شارێ خۆ و وەلاتێ خۆ و مرۆڤايەتييێ هەمييێ.
ئەم دكارين ئەڤێ چەندا مە
بەرى نها ديار كرى ل سەر كەتوارێ ئەم نها تێدا دژين بچەسپينين و هندەك نموونەيان
ژێ بژارە بكەين دا كاكلا ئەڤى تێگەهێ مژاوى زەلال و بەرچاڤ ببيت. بەرێ خۆ بدە دايك
و بابان دەمێ ڕەفتارەكا ب ڤى شێوەى د گەل زاروكێ خۆ يێ پێنەگەهشتى ئەنجام ددەت.
ئەرێ ئەو چ نهێنييە ئەڤێ بێهن فرەهييێ و هەدارێ بۆ وان دابين دكەت دا كو هەتا ئەڤى
ڕادەى ئەو بشێن سەرەدەرييێ د گەل ڕەفتارێن شێتانە يێن زاروكێ خۆ بكەن؟! تۆ بێژى
ئەو سۆز و ئەڤينى بيت يا خودێ ئێخستييە د دلێ وان دا بۆ زاروكێ وان؟ ئەز بێژم دێ
بەرسڤ "بەلێ" بيت.
هەر وەسا ل دويڤ ئەڤى
بنەمايێ مە ل سەرى ئاماژە پێداى، تۆ دكارى بەرێ خۆ بدەيە هەڤژينان، ئەو هەڤبەندييا
د ناڤبەرا واندا گەلەك جاران ئەڤى تێگەهى دحەبينيت و هەمبێز دكەت.
ئەرێ ئەو چ ئيكسيرێ
سێربەندييە ئەڤى زەلامى ڤەخوارى و ئەو هێز و ئەو ڕەوشەنبيرى بۆ دروستكرى كو بێهنا
خۆ فرەه بكەت و هەدارێ بكێشيت بەرانبەر ڕەفتارێن هەڤژينا خۆ يا د هەمى بياڤان دا
ئاستێ وێ كێمتر ژ ئاستێ وى؟ يان بەروڤاژى دەمێ ئافرەت هەدارێ دكێشيت د گەل زەلامێ
خۆ يێ ئاستێ وى كێمتر ژ ئاستێ وێ؟
من بهيستييە، گەلەك دبێژن
ئەگەر ژ بەر خاترا زاروكان نەبايە ب چ ڕەنگان ئەز قايل نەدبوون ب ئەڤێ چەندێ. ئەڤە
ئێك ژ ئەوان ئەگەرانە يێن ئێك ژ هەڤژينان هەدارێ دكێشيت بەرانبەر يێ دى و بێ هەژمار
ئەگەرێن دى ژى هەنە لێ ل ڤێرە ئەو دەرفەت نينە هەميان ڕێز بكەين.
نموونە د زۆرن لێ ئەڤێن مە
ئاماژە پێداين تێرا وى كەسى هەنە يێ حەز بكەت ل بابەتى تێبگەهيت.
ئەڤێ هەداركێشانێ
هەڤبەندييەكا ڕاستە ڕاست د گەل ئەوێ بەرژەوەندييێ هەيە يا ئێك پێخەمەت وێ هەدارێ
دكێشيت بەرانبەر ئێكى و هندى ئاستێ ئەوێ بەرژەوەنديێ كێم ببيت ئاستێ هەداركێشانێ
ژى كێم دبيت و بەروڤاژى ژى هەر دروستە.
به‌یار قه‌ره‌نی
ل گوڤارا زێیێ بادینان ژماره (32) ل سالا 2026ز.
