من خودێ دیت
ناڤەڕۆكا ئەڤێ پەرتووكێ ژ چەند زانينێن ئايينى يێن پايە بەرز پێكدهێت و بـ هويرى بەحسى گەلەك ژ نهێنييێن هەبوونێ دكەت و لـ سەر ڕوح و لەش و ناخى دئاخڤيت هەر وەسا تاكپەرستنێ و ئيسلامێ و قورئانێ بـ زمانەكێ كوير و بـ ڕاستييان دەولەمەند شرۆڤە دكەت. دەربڕينێن وێ د مێشكى دا دژين و جهێ خۆ د كاكلا دلى دا دكەن.
و پەرتووك بۆ كەسانێن تايبەتێن تايبەتانە ئەوێن حەز ژ هزركرنێ دكەن و د گەل هەر پيتەكێ دژين و هەڤالينييا ڕامانان دكەن و نە بۆ كەسانێن ئاساييە ئەوێن بـ تنێ بۆ دەمبووراندنا بێ ڕامان دخوينن.
و سەرەڕاى ئەڤێ چەندێ، ئەو ڕاستى بـ خۆيە ئەوا چ گومان تێدا نە هەر چەندە پيت نكاريت سالوخەتێن وى ديار بكەت و چاڤى شيان نينە وى ببينيت.. ڕەوشا وى هەر وەك وێ ڕەوشێ يە دەمێ مرۆڤ بيرييا تشتەكى دكەت بۆ ماوەيەكێ درێژ و مرۆڤ نكاريت دەربڕينێ ژێ بكەت يان سالوخەتێن وى ديار بكەت. ئەو يێ د ناڤ هەر تشتەكێ جوان دا.. يێ د هەلاتنا سپێدەيێ دا و د سۆرياتييا ڕۆژئاڤابوونێ دا و د ڤەبوونا گولێ دا و د جوانييا زاروكى دا و د ئاوازێن بلبلان دا و د چاڤێن فرەه دا ئەوێن وەك پەرداغێن دلۆڤانييێ.
ئەستەمە خودێ بهێتە سنورداركرن د ئاسۆيێ ديتنا چاڤان دا. ئەستەمە بهێتە هژمارتن و دابەشكرن.مەرەم ژ ديتنا خودێ نە ديتنا چاڤانە لێ مەرەم ژێ ديتنا عەقلييە و ژيرمەندييێ و هەستكرنێ يە.. هەستكرن بـ ئامادەبوونا خوداوەندى بـ مانديبوونێ.. هەر وەك دەمێ مرۆڤ ماندى دبيت دەمێ بيرييا كەسەكى دكەت يان د ئەڤينييێ دا بێى بزانيت دەربڕينێ ژ وێ ڕەوشێ بكەت يان سالوخەتێن وێ ديار بكەت.. و ئەو ڕەوش هەر لـ سەرى تا بنێ پييا مرۆڤى داگير دكەت.. ديتنا ژيرمەندييا دويماهييێ ژ لڤينا ڕويدانان.. خواندنا ڕامانا نهێنى بۆ تشتێن هوير ئەوێن لـ سەر تە دبورن د ژيانا تە دا ئەوێن تە هزر دكر كو ئەو هەلكەفتێن بێ ڕامانن پاشان بۆ تە ديار دبيت كو هەر هەلكەفتەكێ ڕولێ خۆ يێ هەبووى و هەر ڕويدانەكێ مەبەستەك يا هەبووى د نڤيساندنا ژيرمەندى و مەبەستا جوان دا لـ پشت هەر كارەكێ تە كرى. ئەڤ چەندە هەمى ديتنا خودێ يە د كارێ وى دا. دياربوونا دادپەروەرييا خوداوەندى لـ پشت تاڕياتييا ديار بۆ چاڤان ديتن و زانينا خودێ يە د دادپەروەرى و حەزكرنا وى يا ڤەشارتى دا.
يا گرنگ ئەوە ئەم بزانين چەوا بـ عەقلى و ب ژيرانە بخوينين نە بـ چاڤان. و چەوا خودێ ببينين د تومارا كريارێن وى دا؟ و چەوا كاريگەرييا دەستێن وى ببينين ل سەر چێكرييێن وى ؟ و چەوا ئەو تشتێن ل پشت تشتێن ديار يێن بێ بها بۆ ڕويدانان بزانين؟ و چەوا ژمارا نهێنى ڤەكەينەڤە ئەوا پەرتووكا قەدەران پێ هاتييە نڤيساندن؟ ئەڤە هەمى نموونەنە بۆ ديتنا عەقلان و ژيرمەندييان و تێگەهشتنان. و ئەڤە بەهرا خۆدان مێشكايە ژ ديتنا خودێ.. و ئەو ديتنا نيشانێن وييە و دياربوونا ژيرمەندييا وييە و تێگەهشتنا دەربارەى وييە.
بۆ خواندنا چه‌ند لاپه‌ران ڤێره كلیك بكه
0 بۆچوونا خۆ ده‌رببڕه:
إرسال تعليق