ته‌ڤنپیرك

 ته‌ڤنپیرك




      وە‌‌ك هە‌ر جار نڤيسە‌ر‌ێ ب ليمە‌ت موستە‌فا مە‌حمود ب ڕێكا ئە‌ڤێ چيرۆكێ كوير دچيتە‌ د ناڤ ناخێ مرۆڤى دا، دە‌مێ زانست ب پێلێن خۆ ڤە خۆ ل كە‌نارێن فە‌لسە‌فە‌يێ و ميتافيزيكێ ددە‌ت تەڤنەكێ ئاشۆپى دڕێسيت هزر د هەمبێزا وى دا نازان دكەن.

       قە‌هرە‌مانێ ئە‌ڤێ چيرۆكێ سنوورێن عە‌قلێ مرۆڤى يێ ئاسايى تێدپە‌ڕينيت ل بن سيبە‌را ئە‌وێ باوە‌ريێ كو ڕوح زێدە‌تر ژ جارە‌كێ دژيت و مێشك ڕويدانێن زە‌مە‌نێ بۆرى ب شێوازێ كۆدێن نهێنى عومبار دكە‌ت و هەر دەمێ بڤێت دێ ساخ كەتەڤە و زڤڕينيتەڤە بۆ دەمێ ئەم نها تێدا دژين.

    زەمەن ژى مينا جهى د شيان دايە مرۆڤ هەر دەمێ حەز بكەت بۆ بزڤڕيت و تێدا بژيت ئەگەر ئەو ئالاڤ ل بەر دەست هەبن يێن پێدڤى بۆ ڤەگوهاستنێ، چەوا جهى ئالاڤێن خۆ يێن تايبەت هەنە بۆ ڤەگوهاستنێ وەسا زەمەنى ژى ئالاڤێن خۆ يێن تايبەت هەنە بۆ ڤەگوهاستنێ.

     نهێنييا مرۆڤى يا مەزن ڕوحە و ڕوح ژى ب مرنا لەشى نامريت بەلكو دمينتە ساخ و دهێتە ڤەگوهاستن بۆ لەشەكێ دى و بۆ زەمەنەكێ دى و جهەكێ دى. دێ چەند يا سەير بيت ئەگەر مرۆڤ خۆ ل دەمەكێ دى دا ببينيت و هەست ب هەمى خۆشى و نەخۆشى و ڤيان و ئازارێن گرێداى ب ئەوى دەمى ڤە بكەت!

       نڤيسە‌ر ب شێوازێ خۆ يێ دلڤە‌كە‌ر و ب شارەزاييا خۆ يا زانستى و ئەدەبى و زمانزانى فە‌لسە‌فەيێ ب ئاشۆپا زانستى ڤە  گرێددە‌ت و مە‌ د گە‌شتە‌كا پڕ خەون و هيڤى دا بەرە‌ف قە‌ڕاغێن زانستى و ڕاستييا ڕويس د گەل خۆ دبەت. 

      د گەل ئاواز و سە‌مايا پە‌يڤێن ئازراندى شە‌رە‌نيخا مرۆڤى يا هە‌تا هە‌تايى د ناڤبە‌را جە‌مسە‌رێ مادى و جە‌مسە‌رێ ڕوحى ب زە‌لالى د ئە‌ڤێ گە‌شتێ دا ديار دبيت، مينا تە‌ڤنێ تە‌ڤن پيركێ خۆ د ئارە‌زوويێن مرۆڤى دئالينيت دا سە‌نگە‌رێن شێتاتييێ و توخيبێن زانينێ دە‌رباز بكە‌ت و بە‌رسڤە‌كا مژگرتى ل سە‌ر ڕامانا هە‌بوونێ و نهێنييا ڕوحێ بدە‌ت.

     چە‌ند تاقيكرنە‌كا هزرى يا تژى تە‌ڤن و تە‌لسە‌م و فێلە‌، چە‌ندين پە‌نجە‌رەيان ل هنداڤ نە‌پە‌نييێن ناخى يێن بە‌رفرە‌هـ ڤە‌دكە‌ت و ل دويماهييێ دسە‌لمينيت كو ترسناكترين جيهانا ئاشۆپى نە‌ دويرترين هە‌سارە‌يە‌ د گەردوونى دا يان كويرترين خالە د نافكا هەتاڤێ دا بە‌لكو ئە‌و جيهانە‌ يا خۆ د هە‌مبێزا دلى و ڕوحێ دا ڤە‌دشێريت.    


                                                              

 بەيار قەرەني


Share:

0 بۆچوونا خۆ ده‌رببڕه‌:

إرسال تعليق

هه‌ژمارا سه‌ره‌دانكه‌ران